ازاي تغذي كلبك صح



ازاي تغذي كلبك صح




مينفعش تكون بتربى كلب و معندكش معلومات كافية عن تغذيته.

في البوست ده هنتكلم عن تغذية كلبك من الولادة لحد ما يكبر



انفصال كلبك عن الأم بالكتير أوى عند عمر ٨ أسابيع و ممكن عند ٦ اسابيع لأن لبن الأم بيكون مهم جداً و غنى بالأجسام المناعية و العناصر الغذائية المفيدة.



من عمر ٦ - ٨ اسابيع يتغذى الجرو من ٣ - ٤ وجبات يومياً و دة لأن الجرو وقتها محتاج تغذية اكتر من الكلب البالغ عشان دى مرحلة عمرية مهمة لبناء جسم سليم.



بعد ٨ اسابيع الجرو يآكل مرتين فى اليوم دة كويس جداً.



من ٣ - ٦ شهور الجرو وقتها هيكون بيسنن و دة ممكن يأثر على شهيته و ميكلش كتير عشان كدة هتقدمله وجبتين يومياً لكن بكميات أقل من الطبيعى بس غنية بالبروتين و الكالسيوم و أكلات خالية من العضم أو أى حاجة ناشفة عشان صحة اسنانه.



من ٦ شهور لسنة وقتها هتشوف كلبك حجمه بيكبر و تفتكر إنه خلاص كبر لكن فى الحقيقة هو لسه جرو و عنده احتياجات مهمة فى الأكل عشان كدة قدمله وجبتين يومياً موزونين فيهم بروتين زى الفراخ و اللحمة و البيض و كربوهيدرات زى المكرونات و الأرز و العيش و متحاولش تقدم وجبات ضعيفة فى المرحلة دى او وجبات من غير بروتين، و مفيش مشكلة لو أكل اكتر من وجبتين لكن مش أقل.



بعد عمر سنة يآكل مرتين فى اليوم صباحاً و مساءاً مش أكتر ولا أقل.



- طب لو كلبى بيآكل دراى فود هيبقى إيه الوضع؟



التغذية وقتها هتكون حسب نوع كلبك و دة طبقاً لآخر الدراسات الحديثة لتغذية الحيوانات الأليفة بالمنظمة الأمريكية للطب البيطرى:



الجريفون و اليورك شاير: من ربع لتلت طبق يوميا.



كوكر: من ۱ - ٢ طبق يومياً



بوكسر، روت، لبرادور، جيرمن، جولدن، بيتبول: من ٢ - ٢ و نصف طبق يومياً



ماستيف: من ٢- ٤ طبق يوميا



كدة إحنا خلصنا عدد الوجبات لكل مرحلة عمرية و أهميتها،
دلوقتى بقا هنقولك على بعض النصائح اللى تآخد بالك منها كويس أوى و انت بتأكل كلبك ✋



حجم الوجبة المثالى يكون نسبياً قد حجم رأس كلبك.



الأكل يكون فى مواعيد ثابته صباحاً و مساءاً عشان انتظام مواعيد الوجبات هيساعد على استفادة كلبك من الأكل بشكل صحى.



كلبك مش زينا يقدر يستوعب تغيير نوع الأكل فجأة و ممكن يجيله اسهال عشان كدة لو هتغير نوع لأاكل لكلبك غيره تدريجيا.ً



وفر لكلبك مياه بإستمرار خصوصاً لو بيتغذى على دراى فود.



التزم بمواعيد أقراص الديدان عشان تحميه من الكائنات الطفيلية دى اللى بتشاركه أكله و بتضر صحته



البيض مش كل يوم ممكن يبقى كل يومين عشان ميعملش حساسية.



اتأكد إن الأكل مسلوق أو مستوى كويس بلاش يكون نى عشان الأمراض و بلاش عنب أو زبيب فى الأكل.



لو هتأكل كلبك سمك ميكنش نى و يكون مستوى كويس و يقدم مرة واخدة فى الأسبوع لأنه مفيد جداً لتقوية الشعر و الجلد.



اخيراً نتمنى إن البوست دة يفيدك و يعود على كلبك بالنفع و يكون مصدر مهم ليك لتغذية كلبك لصحة افضل له








  • Share

    • 1308
    • 2,067

    Submit your articles

    Submit your articles now to Orrec.