تعرف على كيفية زرع اجمل النباتات في شرفتك و حديقتك

لما تحب تجيب زرع داخلي لبيتك فكر النبات ده هيفيدك ازاي لان نباتات الزينه مش للزينه بس 

 تعرف على كيفية زرع اجمل النباتات في شرفتك و حديقتك

طب نباتنا ده بقا مينفعش ميكنش موجود في كل بيت عارفين ليه؟؟ 


لانه مصنف طبقا لوكالة ناسا إنه من أفضل النباتات قدرة على تنقية الهوا من الفورمالدهايد وملوثات الهوا الضارة 

ده كمان في تنفسه بالليل بيخرج الأكسچين وياخد ثاني أكسيد الكربون يعني كمان يصلح لغرف النوم

والصبار مثلا قدرته هايله على تحمل قلة الرعاية يعني مناسب للمبتدئين  

ده غير شكله الجميل وجمال أوراقه وحوافها سبحان الله  😂


الحبوب الحلو ده صبار جلد النمر

أو سانسيفيريا او بالانجليزي snake plant


 مبيحبش الشمس عشان كده بيتزرع جوا البيت في مكان اضاءته عاليه وكمان بيتحمل قلة الاضاءه لكن بتأثر على نموه.


الري لما التربه تجف تماما وأكبر عدو ليه الري الغزير بيضعفه.


التسميد Npk متعادل مره كل شهر في الربيع والصيف فقط يعني من أبريل ل سبتمبر كده

لأن نموه بيتأثر بدرجات الحراره المنخفضه في الشتا والخريف.


بيتكاثر بالتفصيص وبالعقل الورقيه يعني نقص حتة ورقة كده تبقا نبات كامل  

و لازم نكتر من الحلوين السهلين اللي بجو البيت مبسوطين

 البوتس

ومينفعش بيت ميكنش فيه بوتس  

طبعا هو بيتزرع للحصول علي مجموع خضري جميل ومبهج 

تخيلو ورقة واحده تطلع نبات كامل 

كل ورقه بيكون تحتها جذر هوائي وده هو سر نجاح التعقيل او التكاثر يعني

الجذر ده بيعمل كدعامه للنبات عشان يمتد او يتسلق بيه بس لما بيتحط في الميه او في التربه بعد اسبوع بيكون جذور ويكبر ويكون نبات كامل بفضل الله 


خلو بالكم انسب فترة للتكاثر هي الصيف

ولحد شهر اكتوبر كده لان النبات بيتعب في الشتا ونموه بيقل وورقه بيصفر.


متنسوش كمان الجو المناسب ليه الضل وجوا البيت وبيحتاج فترة اضاءه متوسطه ونبعده عن ضوء الشمس  المباشر وبيحب الاماكن الرطبه وكمان بينجح زراعته في الميه بدون تربه.


ممكن نسمد Npk كل شهر مره وممكن ميحتجش.

 ازرعوا اي حاجه بتحبوها


 تعرف على كيفية زرع اجمل النباتات في شرفتك و حديقتك


اي حد يقدر يزرع في أي مكان عنده، بنزرع في الجنينه والبلكونه والشباك وجوا البيت والمطبخ حتى التويليت نقدر نزرع فيه والله 


ازرعي عشان تتنفسي هوا نضيف وعينك تشوف جمال وابداع ربنا كل يوم والله نفسيتك هترتاح

 مش بس كده احنا بناكل من زرعنا كمان


طب ازرعو عشان كل تسبيحه النبات بيسبحها بتتحط في ميزان حسناتكم 

معندكوش تربه يبقا تزرعوا في مية 

النبات المناسب:

البوتس 

  ده عامل زي الست اللي مستحمله ظروف جوزها وعايشه معاه على اي وضع 

ميه شغال تربه شغال تكاثر وبيدي كتير حاجه كده الله أكبر ورخيص وسهل وراضي بقليله والله 


 الحلوه بقا والشيك في نفسها كده والغاليه قوي اللي مبيجبهاش غير المقتدرين 

هي زنبق السلام 

لما تجيبها أفصل كام ورقه كده بس بالشد مش بالقص

وحطها في ميه هتلاقيها بقت زي البوتس كده بنت ناس وشغاله برضو  واهم ميزه فيها انها بتنقي الجو كمان من نسبه من الميكروبات الهوائية 


 الفلانچيوم او العنكبوت: ده بقا النبات اللي بيظبطلنا الدنيا واحنا مش حاسين

يعتبر من أعلى النباتات كفاءه في تنقية الجو من الملوثات  

ده عظمه على عظمه شغال في التربه وفي الميه وبيتكاثر بالتفصيص وعنايته سهله برضو.


 التلاته دول نباتات داخليه بتعيش في جو البيت ولازم اضاءه عاليه بالنهار طبعا.


 بااااس احنا مش محتاجين أكتر من كده مية وإناء زجاجي عشان نشوف منه حالة الجذور والنبات.

ويا سلام بقا لو ضيفنا شوية حصى او زلط صغيرين بيمتصوا الشوائب.


 عارفين بقا لو بتحبوا السمك  وجبتوا سمكه صغيره كده في الميه كمان هتنفع جدا وهيبقا فيه تبادل منفعه بينها وبين النبات.


الميه بنغيرها كل اسبوع أو لما نلاقي فيها اي تغيير عليها او على النبات نغيرها وممكن نزودها اول بأول لحد ما يظهر تغيير برضو.

ويفضل غلي الميه وتبرديها للتخلص من الكلور.


 طب كده زرعنا وعملنا ديكور جميل ومتكلفناش كتير كمان 

متأكده ان محدش هيشوف ده في بيتك غير وهياخد منك  

 تعرف على كيفية زرع اجمل النباتات في شرفتك و حديقتك


نيجي للسماد

ينفع نعزم حد عندنا عالبيت ومنحطلوش أكل،  عيب صح؟؟

طب ينفع نشربه ميه بس  دا احنا بخلا بقا 

طب نحطله إيه ما احنا مش عارفين بيحب إيه 

حطوله سماد يا اخواانا 

نباتات الزينه وركزوا ف الزينه دي ها يعني مش النعناع ولا اي حاجه ممكن ناكلها 

أغلبها بيحتاج سماد NPk متعادل وهو عباره عن 3 عناصر موجوده بنسب متساويه وهما 

هام لنمو المجموع الخضري Nitrogen

Phosphore هام لنمو الجذور 

Kalium البوتاسيوم هام لعملية التزهير وعقد الثمار 

طب نستخدمه ازاي ؟؟

بناخد ربع معلقه صغيره ندوبها في لتر ميه ونسقي منه النباتات مره كل اسبوعين ري خفيف مش تغريق

ويفضل الري على جوانب الاصص.

طبعا في نباتات تانيه بتحتاج حديد مخلبي وهيومك اسيد وحوارات كتير كده  عشان كده كلمتكم عن العام اللي هو Npk

وطبعا لازم تعرفوا النباتات اللي عندكم بتحتاج ايه

عشان النبات ده فعلا هو فرد من افراد البيت


  • Share

    • 47
    • 956

    Submit your articles

    Submit your articles now to Orrec.